Compostela cultura

Cinco perspectivas - as de Anxos Sumai, Cándido Pazó, Sonia Torre, Suso de Toro e Xosé Manuel Pazos - desde as que reflexionar sobre a emigración , a inmigración, o retorno e o desenraizamento e valorar o drama individual e social que supón este xeito de exilio. Un exilio que supuxo para Galiza acontecemento socioeconómico máis relevante e significativo do pasado século XX.

A emigración e teatro galego
Se ben a novela, a poesía e o ensaio galegos trataron o tema da emigración polo miúdo, o teatro do noso país non se achegara polo miúdo ata este fenómeno. Nos últimos tempos estáse a producir por parte do xénero dramático un interese pola temática da emigración. Podémolo apreciar en Final de Película de Gustavo Pernas, representada por Áncora Producións, e pola que o seu autor está de novo nomeado como mellor autor en galego para a X Edición dos Premios Max, ou con Pola noite diante dos bosques a adaptación realizada por Teatro Dom da obra de Bernard Marie Koltés,
un monólogo dun estranxeiro que foxe da soidade nunha grande cidade que lle é hostil.

Os autores de Emigrados
Os textos de Cándido Pazó, Xosé Manuel Pazos, Suso de Toro, Anxos Sumai e Sonia Torre son a base para a esta montaxe dirixida por Etelvino Vázquez. Cándido Pazó e Xosé Manuel Pazos teñen unha recoñecida traxectoria dentro da escrita dramática galega; o primeiro foi nomeado nos Premios Max do 2006 como mellor autor teatral en galego por García, e o segundo é autor, entre moitas outras da peza María Soliña realizada sobre textos históricos e poemas de Celso Emilio Ferreiro. O multipremiado Suso de Toro, aínda que máis recolecido pola súa obra narrativa e ensaística xa conta con textos representados sobre as táboas como Tic-Tac ou Círculo . A novelista Anxos Sumai e a xornalista Sonia Torre estréanse como escritoras dramáticas cos textos escritos para esta montaxe.

Teatro de Ningures
Máis de vinte anos de historia e máis de vinte montaxes teatrais fan de Teatro de Ningures unha das compañías máis sólidas do panorama teatral galego que participa, de xeito habitual e desde os seus comezos, na rede de teatros e circuítos teatrais dos concellos de Galiza, ou en campañas de captación de público escolar, así como tamén en numerosos festivais e xornadas teatrais do país e do resto de España e Portugal.

Entre as súas montaxes máis recentes destacan Misericordia de Benito Pérez Galdós (2006), Tartufo de Molière (2005), Troianas de Eurípides (2004) ou Círculo, sobre a novela de Suso de Toro (2003).

• (24/06/2010) Francia é o país convidado no Entredanzas 2010
• (10/05/2010) 'Platonov' do Centro Dramático Nacional
• (23/04/2010) Día Internacional da Danza
• (15/04/2010) Sergi López é un home so en 'Non solum'