Compostela cultura

Narf presenta nas Crechas 'Totem', o seu novo disco

Narf

Tras o éxito de 'Só Tambor', Narf non detén o seu carácter creativo e quere mostrar con este novo enfoque musical unha vertente máis do seu estilo propio, que mira á música en movemento, que parte das raíces para se mesturar con ritmos doutras terras como Brasil, Cabo Verde, Mozambique ou Cuba, que absorbe as súas cores, os seus sabores e os seus matices.

Cando un viaxa polo mundo adiante alimentado por ningunha outra cousa que o interese pola arte, é bo deixar pegadas sobre as encrucilladas de camiños para atopar o camiño de volta a casa. Un tótem é un cruceiro sen brazos, un faro para os mariñeiros de terra. E este tótem marca máis de 20 anos de camiño, un camiño que comezou cando Narf deixou a súa casa con nada máis que unha guitarra a costas.

Narf levantou este tótem cada día, con coidado e cariño, con furia e paixón, aquí podemos encontrar o canto delicado e o berro atroz, aquí están as pantasmas, o choro dun neno, o bico dun amante e os ollos no futuro. Aquí o amor é o que máis dá e o que máis nos doe. O que comezou como un tótem persoal foi, finalmente, un tótem para todos nós. Porque neste Totem tamén se poden escoitar as voces e ver as sombras daqueles que tiveron a sorte de camiñar un anaco ao seu carón.

Ligazóns relacionadas:

• Web do disco