Compostela cultura

Rock en Costa 2007

Asociación Xurásica

Celébrase no campo da festa do Castiñeiriño (Compostela) o Festival Rock en Costa 2007. Os locais Samesugas e Royalties estarán acompañados dos ferroláns Riff Raff, os lalinenses Última Sacudida e os portugueses The Act-Ups. O festival que organiza a Asociación Xurásica aposta polos barrios como motores culturais das cidades e polo achegamento coa música de Portugal.

Rock en Costa 07

• The Act-Ups (Barreiro, Portugal)
• Riff Raff (Ferrol)
• Samesugas (Castiñeiriño)
• Última Sacudida (Donramiro, Lalín)
• Royalties (Castiñeiriño)

A representación do país veciño chegará da man de The Act-Ups, de Barreiro. Con dous discos do mercado a súa música defínese como "James Brown em conflito sangrento com os Mc5, um cadillac com o depósito cheio de soul, abastecido por Iggy Pop, numa estação de serviço perto de Detroit".

Riff Raff chegan dende Ferrol. Considerados os AC/DC galegos, ofrecen un espectacular directo. O Castiñeiriño estará representado este ano polos Samesugas, que acaban de publicar o seu primeiro disco de longa duración, Alá vai, e Royalties, herdeiros da mítica banda compostelá Redullos e que se atopan a medio camiño entre o rock de Detroit e o escandinavo.

Completan o cartel Última Sacudida, de Donramiro (Lalín), que mesturan o máis reivindicativo do punk de finais dos setenta e a tradición dos grupos galegos máis contundentes. Acaban, tamén, de gravar o seu primeiro disco.