Compostela cultura

A fadista Mariza inaugura Sons da Diversidade

Mariza

Esta cantante non só trae a Compostela non só o fado tradicional senón tamén o que ela define como "orgánico" e que deu a coñecer no seu segundo disco, Fado transparente, publicado o 25 de abril en Portugal, na conmemoración do 31 aniversario da Revoluçâo dos Cravos.

A fadista do momento vén do soul e do funk: mozambicana de nacemento e adoptada despois polo barrio lisboeta de Mouraria, comezou con Fado en mim, por suxestión do produtor e musico Jorge Fernando, quen a escoitou unha noite.

Do fado clásico pasou ao "orgánico" no seu segundo disco Fado curvo, producido por Carlos María Trindade, de Madredeus. Comezaron as xiras por Europa e os Estados Unidos. As colaboracións medran e Mariza canta con Sting, Teresa Salgueiro e Cesária Évora, entre outros artistas.

En Fado transparente, publicado en Portugal o 25 de abril e gravado en Rio de Janeiro, reúne catorce cancións, con arranxos e produción do músico brasileiro Jaques Morelenbaum, director musical de Caetano Veloso e músico de artistas como Milton Nascimento, Gal Costa ou Ryuichi Sakamoto.

Trátase dun traballo que, en palabras da artista, "pretende tratar o fado con dignidade e sen impoñer límites, pero recoñecendo a liña que debe seguir". A madurez de Mariza queda reflectida en temas como "Duas lágrimas de orvalho", que interpreta acompañada só polo violonchelo de Morelenbaum.

Entre os galardóns recibidos durante o pasado ano destacan os tres concedidos pola BBC Radio, entre os que se atopa o Premio á Mellor Artista Europea de World Music, e a distinción en Portugal como Persoeiro Portugués do Ano.

O Programa Sons da Diversidade volve a Compostela no outono. Este ciclo de concertos impulsado pola Concellaría de Cultura do concello de Santiago ten lugar no Auditorio de Galicia e xa viviu unha primeira etapa dende o 2 de abril ata o 22 de decembro de 2004.

A idea central do ciclo, que volveu en 2005 o 22 de febreiro, é a de amosar, nun dos espazos emblemáticos da cultura en Compostela, diferentes tendencias da creación musical actual no mundo. Ao tempo, quérese potenciar o Auditorio como punto de reunión para todos os públicos da cidade.

Sons da Diversidade é unha fiestra aberta a todo tipo de propostas e xéneros musicais. Unha programación asociada á diversidade e á calidade, feita dende o século XXI para un público inquedo, aberto e intelixente.

Ligazóns relacionadas:

• O fado orgánico de Mariza
• «Sigo cantando fado, pero quero facer unha música máis miña»