Compostela cultura

Nestas xornadas abórdase a relación entre comunicación e sociedade, e as novas posibilidades do xornalismo na era na que cambian os modelos sociais e informativos. Comezaron o mércores 30 ás 18:30, no Comedor Real do Hostal dos Reis Católicos, coa conferencia inaugural "Un novo modelo de comunicación, un novo modelo social", a cargo do Secretario do Estado de Comunicación, Fernando Moraleda, o Presidente da Xunta, Emilio Pérez Touriño, e o Secretario Xeral de Comunicación, Fernando Salgado. Logo dun cóctel, ás 20:00, houbo unha mesa redonda sobre comunicación e sociedade en Galiza, moderada por Xosé Luis Barreiro Rivas, na que participaron Xosé Hermida, delegado de "El país" en Galiza, Edelmira Carracedo, subdirectora de informativos da TVG, o director d'"A Nosa Terra", Afonso Eiré, Luis Villamor, director de política de "La Voz de Galicia", Xavier Cea, de "El Correo Gallego", Ánxel Vence, de Faro de Vigo, Anxo Quintela, director de Vieiros, e Miguel Túñez, decano da Facultade de Ciencias da Comunicación.

O xoves 1, ás 18:00, o Auditorio da Facultade de Ciencias da Comunicación acolle a Benigno Sánchez, director xeral da CRTVG, coa conferencia-coloquio "A produción cualitativa: un modelo eficaz no mercado maduro," a cargo de Pedro Revaldería, director de produción propia de Telecinco.

E por último, o venres 2, ás 20:00 e novamente no Comedor Real do Hostal dos Reis Católicos, Fernando Salgado presentará unha conferencia-coloquio sobre os itinerarios do novo xornalismo, na que intervirán Ignacio Ramonet, director de "Le Monde Diplomatique", e o xornalista e músico Ramón Chao. As xornadas rematarán cun cóctel ás 21:30.

Dúas figuras clave do xornalismo

Ramón Chao (Vilalba, Lugo, 1935) é músico, escritor e xornalista. Criouse tocando o piano na fonda que rexentaban seus pais, un punto de encontro para persoeiros como Cunqueiro ou Celso Emilio Ferreiro. No 1956 emigra a Francia para estudar piano, e remata por dirixir emisións radiofónicas en galego, que foron prohibidas por Franco, e ser correspondente da revista "Triunfo". No 91 foi nomeado Cabaleiro das Artes e das Letras polo goberno francés.

Colabora en diversos medios xornalísticos, como "Le Monde Diplomatique," onde fai crítica literaria. É autor, entre outros libros, da Guía secreta de París (1975), O lago de Como (1982), Palabras no tempo, Conversas con Alejo Carpentier (1984), Un posíbel Onetti (1992), Un tren de xeo e lume. Man Negra en Colombia (1994), Prisciliano de Compostela (Seix Barral, 1999) ou A paixón de Carolina Otero (2001). Actuamente é redactor xefe en Radio Francia Internacional, e membro do colectivo antiglobalización Attac.

Ignacio Ramonet (Redondela, Pontevedra, 1943) é doutor en Semioloxía e Historia da Cultura e catedrático de Teoría da Comunicación. Especialista en Xeopolítica e Estratexia Internacional (experto-consultante das Nacións Unidas), e foi premiado en numerosas ocasións polo seu labor xornalístico. É autor de varios libros, a meirande parte traducidos a diversas linguas: A lambetada visual, (1985 e 2000), Como nos venden a moto, (con Noam Chomsky, 1995), Il Pensiero Unico (con Fabio Giovannini e Giovanna Ricoveri, 1996), Nouveaux pouvoirs, nouveaux maîtres du monde (1996), Un Mundo sen rumbo (1997), Rebeldes, deuses e excluídos (con Mariano Aguirre, 1998), A tiranía da comunicación (1999), Propagandas silenciosas (2002) ou Guerras do século XXI (2002). Na actualidade, dirixe "Le Monde Diplomatique" e "Manière de voir." É membro do colectivo antiglobalización Attac.

• (29/10/2009) II Xornadas Lois Obelleiro de Historia, pensamento e cultura
• (27/04/2009) Roger David Kornberg visita Compostela da man do Programa ConCiencia
• (31/03/2009) 'Identidade e arte', no CGAC e o Museo do Pobo Galego
• (03/03/2009) Cursos de grafitti, beat-box e hip-hop no Centro Sociocultural do Castiñeiriño