Compostela cultura

Continúa AMAL con dous documentais

Fundación Araguaney

O Festival continúa cos documentais SAZ e Paradise lost.

SAZ Director: Gil Karni
Data: 2004
Nacionalidade: Israel
Duración: 50´

Paradise lost Directora: Ebtisam Mara´Ana
Data: 2003
Nacionalidade: Palestina / Israel
Duración: 56´

SAK representa un ano dramático na vida do cantante de rap árabe Samekh Zakhut, de vinte anos, que vive nun barrio xudeu en Ramle, e pertence á terceira xeración dunha familia comunista. Samekh acumulou sentimentos fortes de insultos e odio polo que lle está a pasar ó seu pobo, os palestinos. Grava cancións de rap e hip hop como modo para transmitir esas mensaxes. O filme continúa cá estreita relación entre Samekh e o seu avó, Abdullah que foi desafiuzado á forza do seu pobo na guerra do 48 e móstranos a diferencia entre as súas ideoloxías durante a visita de Samekh á casa do seu avó.

Por outra banda, Paradise lost conta a historia de Paraíso, un pintoresco pobo pesqueiro no Mediterráneo. A película segue á directora ó Reino Unido, onde atopa á señora Suaad George, unha doutora en Dereito acosada polas pantasmas do seu pobo e o seu pasado. O encontro con Suaad provoca que a directora se pregunte se a pesar da diferencia xeracional, o seu destino é o mesmo (fóra do Paraíso). Esta é unha película acerca da recreación dunha historia perdida e sobre a definición moderna de ser muller dentro dun pobo tradicional árabe.

AMAL (esperanza, en árabe) pretende abrir vieiros para o desenvolvemento do audiovisual árabe e español en coproducción, asociación e intercambio, e para entrar a formar parte dun mercado de coprodución no mundo árabe no que xa participan Francia, Bélxica, Holanda e mesmo os Estados Unidos.

Ao se transformar en festival competitivo, Amal busca fomentar o desenvolvemento de proxectos de calidade de produción árabe, en coprodución con algún país do mundo árabe ou de temática árabe.

Dentro das actividades do festival, coma nas anteriores edicións, Amal contará con sesións de pitching, nas que representantes do mundo audiovisual galego e do resto do Estado poidan contactar, debater e estabelecer relacións para futuras colaboracións con representantes dos países árabes.

Ligazóns relacionadas:

• A gran festa do cine árabe
• O público de Amal premia a «Internacionales en Palestina», de Alberto Arce
• Michel Khleifi: "Occidente debería romper os clixés do mundo árabe"